ليوم جبتلكم gâteau roulé بنين برشا و خفيف و سااااهل.
اول حاجة حضرت جنواز جربت برشا مرات و هذه جاتني اخف وحدة والسر في الخطوات وزادا العضم ( البيض) خرجوه قبل بوقت من الفريجدار و الفور سخنوه من قبل و ما تخليوهاش برشا في الفور (بين 10 و 15 دق) باش تجيكم طرية مش يابسة.
بالنسبة للكرام انا حطيت crème mousseline هي عبارة على كرام باتيسيار+ زبدة. كريمة خفيفة و مش قوية برشا و خاصة مكوناتها موجودة في كل دار وباش تنجحلكم احسن حاجة لازم درجة حرارة الكرام باتيسيار والزبدة الي نحطوها في الاخر تقريبا هي نفسها.
تنجمو زادا تحطو اي حاجة على ذوقكم: موس شكلاطة ولا كرام شانتيي ولا نوتيلا…
مقادير الجنواز:
4 بيض
100غ سكر
100غ فارينة
ملعقة صغيرة فانيليا
مقادير ال كرام موسلين:
3 اصفر بيض
50غ سكر
30غ نشاء
250مل حليب
25غ زبدة
100غ زبدة طرية اخرى
اول حاجة نحضرو مكونات الجنواز
نفصلو الاصفر عالابيض و ردوا بالك الابيض اذا جات فيه قطرة ماء ولا قطرة من الاصفر متنجحش
نركضوه حتى يولي هكا و بعد نزيدو السكر
ونكملو نركضو حتى يولي يلمع و يذوب السكر
وبعد نصبو عليهم الاصفر و نكملو نركضو
في الاخر نزيدو الفارينة و نحركو من فوق لتحت بالشوية
حتى يولي هكا
نحطو papier cuisson في طبق الفور
و نحاولو نستويوها من الجيهات الكل
نخليوها في الفور تقريبا بين 10 و 15 دق على 180 درجة و اول ما نخرجوها نلفوها كيما تشوفو في التصويرة و نخليوها تبرد
نحضرو الكرام باتيسيار و اول حاجة نفصلو الاصفر عالابيض و نزيدوهم السكر والفانيليا والنشاء
و نركضوهم حتى يولي لونهم هكا
نصبو عليهم الحليب السخون بالشوية و نحركو في نفس الوقت
و نرجعوهم عالنار مع التحليك حتى تحضر الكريمة
نزيدوها 25 غ زبدة و هي سخونة و ننغطيوها و نخليوها في الفريجدار حتى تبرد
بعد ما بردت نركضوها بالباهي حتى تولي رطبة
و نقصو 100غ زبدة طرية مربعات صغار و نزيدوهم بالشوية بالشوية واحنا نركضو
حتى تولي كريمة مزيانة كيما هكا
نحلو الجنواز متاعنا و نحطو الكرام انا زدت حطيت فراز و فستق
و نرجعو نلفوها و نخليوها تبرد بالبااااااهي
بالنسبة لل ganache au chocolat سخنو 100مل كرام فراش ولا سائلة و بعدوهم عالنار و زيدوها 100غ شكلاطة مبشورة خليوهم 5 دق من غير ما تحركو و بعد حركوهم بالشوية حتى يولي عندك كيما هكا
هذا شكل الجاتو بعد ما قصيتو
نشالله تجربوه و يعجبكم اذا عجبتكم متنساوش تعملو partager
