محنشة مالحة – Mhancha salée

محنشة مالحة

عسلامة الناس الكل
جبتلكم وصفة ياسر بنينة و مزيانة تودو بيها رواحكم و ضيوفكم
هي تبان صعيبة اما هي ساهلة برشا
بالنسبة للمقادير متاع العجينة تستحقوا :

  • 300غ فارينة
  • 150غ سميد ارطب
  • مغرفة ماكلة خميرة كيميائية
  • شطر مغرفة قهوة خميرة خبز
  • مغرفة صغيرة سكر
  • ماء دافئ للعجن

بالنسبة لمقادير الحشو:

  • بصلة صغيرة
  • فلفل حلو مقطع مكعبات
  • 300غ لحم مفروم
  • ملح و فلفل اكحل وشوية كركب و شوية اكليل وزعتر

نبداو توا في المراحل متاع تحضير المحنشة ركزو معايا بالباهي

اول حاجة  نبداو نحضرو الحشو و مش العجينة خاطر نحبوه بارد و مافيهش زيت :

        1. حط شوية زيت وقلي فيه البصلة الصغيرة ثم زيد الفلفل وزيد قليه شوية
        2. زيد اللحم المفروم والفاحات قليهم بالباهي حتى ينشف من الماء الي باش يخرجو اللحم
        3. وقت تتاكدو الي هو طاب خليوه يستقطر من الزيت وحطوه فوق ورق مطبخ باش ينشف من السوائل الي فيه

نتعداو توا نحضرو عجينتنا :

        1. خلطو المكونات الجافة مع بعضها ثم اعجنو بالماء حتى تولي العجينة لينة
        2. قسموها الى 9 كورات صغيرة وغطيوهم وخليهم يرتاحو 10 دق

توا بعد ما كل شي حضر مش نبدا في تشكيل المحنشة متاعنا
وقبل كل شي نحضرو صحن في شوية سميد ارطب ومغرفة صغيرة خميرة كيميائية باش نرشو منو فوق كل ورقة نحلوها باش تجينا العجينة فيها تقرميشة كيما الpâte phyllo.

        1. ندهنو الطاولة متاعنا بالزيت و نبداو نحلو الورقة الاولى بايدينا كيما نحلو الملاوي
        2. بعد ما تحلوها وتولي شفافة  رشوها بشوية من خلطة السميد والخميرة
        3. حطو شوية من الحشو ولفوها كيما تلفو كعبة البريك كملو ال9 كويرات بنفس الطريقة
        4. ناخذو توا اول وحدة و ندوروها عبارة باش نشكلو حلزونة
        5. ناخذو وحدة اخرى ندخلوا الطرفين في بعضهم باش تجينا مزيانة ونكملو ندوروها على اول وحدة عملناها ونكملو هكاكا حتى تكبر ويكملو الكعبات الكل وهكاكا تكمل المحنشة متاعنا وما بقى كان ندخلوها للفور تتحمر اما قبل كل شي ما تنساوش تدهنوها بشوية زبدة باش تجينة حمرة ومقرمشة والفور على 180 درجة

انشالله تكون عجبتكم الوصفة

الوصفة مقتبسة من قناة يوتيوب حلويات كرميلا

Commentaires