انشالله مولدكم مبروك و كل عام وانتم بخير .
مقادير عصيدة الزقوقو:
- 1 كغ زقوقو
- 3 لتر ماء
- 750 غ فارينة
- 300غ سكر او اكثر او اقل حسب الذوق
- علبة حليب مركز محلى
المراحل في الصور
مقادير الكريمة العربي :
- 4 عضمات او 4 اصفر عضم
- 100غ سكر
- 1 فانيليا
- 25غ نشاء
- 500مل حليب
- 50غ زبدة طرية
المراحل في الصور
بعد ما تغسلو الزقوقو بالباهي و خليتوه يشيح في الشمس سخنو شوية فوق القاز و ارحيه برحاية اللحم مرتين او 3 مرات
ناخذو لتر و نصف من الماء و نبلو فيه الزقوقو المرحي
ثم نصفيوه بغربال جويد
و الي نتحصلو عليه في الغربال نعاودو نصبو فيه باقي كمية الماء و نصفيوه مرة اخرى
حاولو صفيوه باجود حاجة عندكم ممكن حتى قطعة قماش باش تتاكدو انو العصيدة ما فيهاش قشور و هكاكة تجيكم رطبة و مش حرشة
غربلو الفارينة و صبوها على خليط الزقوقو والماء و هو بارد
حركو بالباهي و ما تخافوش اذا دبلت تو تتحل بالشوية بالشوية
نحطو الطنجرة فوق نار هادية
اول ما تبدا تبقبق صبو عليها حكة نستلي و كملو حركو بالباهي
صبو كمية السكر و بالطبيعة تنجمو تزيدو ولا تنقصو حسب الذوفق
بعد ما تحطو السكر العصيدة تولي غامقة وقتها تكون جاهزة باش تصبوهاا في الصحافي
هذه مكونات الكريمة
اول حاجة خلطو السكر و العضم والنشاء
حتى يولي الخليط ابيض
نصبو عليها الحليب السخون
و نرجعوهم الكل فوق النار
حتى تولي كريمة متماسكة و تبدى تغلي
وقت هي سخونة زيدوها الزبدة و صبوها فوق عصيدتكم و بالطبيعة تنجمو تزيدو اي نكهة مثل ماء ورد ولا عطرشية
و هذه العصيييييدة بعد ما تزينت انشالله تكون عجبتكم
و ما تنساوش تعملو جام و برتاج
Commentaires
