المسفوف من اكلاتنا وعاداتنا التونسية للي ما يعرفوهش هو كسكسي ومعاه برشا مكسرات وزبيب وتمر فما شكون يزيد يحط فيه رمان.
من عاداتنا زادا يتقدم المسفوف في صحن كبير، قلت علاش لا ما يتحطش في كويسات باش ننجمو نقدموه بسهولة في السهريات والعشويات بطريقة مزيانة وجديدة انشالله تعجبكم.
المقادير:
- كسكسي مفوّر
- تمر
- زبيب
- بفريوة/لوز/فسدق…
- شوية ماء
- شوية زيت
- سكر محوّر
- كريمة جنواز + شوية زهر(اختياري)
الخطوات :
- بعد ما تفوّر الكسكسي صب عليه سكر (حسب الذوق) و ماء و زيت باش ما يقعدش شايح.
- زيد الزبيب و الفاكية والتمر.
- حضر كريمة عادية الي في ساشايات (متاع العصيدة) و زيدها شوية زهر ولا حضرها وحدك في الدار تلقاو روسات الكريمة هنا
- صبها في قاع الكاس.
- و بعد صب فوقها الكسكسي و زينها بتمرة من فوق.
- تنجمو تاكلوه سخون ولا بارد.
صحة و بالشفاء
