من ابنّ التارتات الي تنجمو تاكلوهم جربوها و ما تندموش
ما تنساوش باش تشوفو بقيّة الوصفات الموجودة على الصفحة، الوصفات تحضيرها ساهل وبرشة وصفات مراحلها بالصور. إذا عجبتك الوصفة أعمل جام وبرتاج،،، واذا جربتها صورها وحطّ التصويرة في التعاليق.
المقادير:
للتارت:
- 170غ فارينة
- 100غ زبدة
- 50غ بفريوة مرحية
- 50غ سكر محور
- مغرفة ماكلة كاكاو
- عضمة (صغيرة)
خلط الفارينة و الزبدة بيديك حتي يولي عندك خليط كي التراب
صب السكر و الكاكاو و رشة ملح و البفريوة و خلط بيديك وحدة وحدة من غير ما تعجن
زيد العضمة و لمّ العجينة من غير ما تعجن حطها في الفريجدار الوقت الي تحضر فيه الكريمة.
للكريمة:
- 250غ شكلاطة
- 250غ كرام LIQUIDE ( تلقاوها في باكوات كي باكوات الحليب)
- 2 عضمات
- 25غ زبدة
- 25غ سكر
حط الكريمة تسخن. هبطها من النار و صب الشكلاطة خليها دقيقتين من غير ما تحركها و بعد خلطها حتى تذوب الشكلاطة الكل.
زيد العضم والزبدة والسكر و حرك بالباهي
حل عجينة التارت في القالب الي عندك و صب الكرام فوقها و خليها في الفور على 180 درجة.
وصحة و بالشفاء.
